دخل شحيبر على زوجته مزقطط والفرحة مش سايعاه
شحبورة شحبورة باركييييييييييييييلى

خير ياشحيبر ربحت المليون

أكتر اكتر ياشحبورة هاروح أحج

تحج ---------- تحج كده مرة واحدة ياشحيبر

ايوة ياشحبورة هاروح اتصور واطلع باسبور

استنى هنا بس الكلام ده مايدخلش الدماغ حج ايه انت حيلتك اللضى

ربك كريم ياشحبورة سيبينى بس احلق واتوضب عشان الصورة

شحيبرررررررررررررررر

فييييييه ايه

انت بتحوش من ورايا ياشحيبرررررررر

ابدا والله

امال جبت فلوس الحج منين

 انا لسه قاصداك فى 10 جنيه قلت مافيش هتدفع 10 الاف منين

سيبينى بس الحق أنزل وبعدين احكي لك

تندب ياميلة بختك ياشحبورة جوزك بيحوش من وراكى ياشحبورة

اسمعي ياستى
الاستاذ جمال جارنا كان طالع يحج هو وباباه ومامته

اه ما انا عارفة

مامته تعبت ودخلت المستشفى ولازم هو يفضل معاها

 بس باباه عاوز يحج وهو كبير فى السن ومقعد محتاج اللى يخدمه

الاستاذ جمال طلب منى اطلع معاه أخدمه واحج فرصة من السما

والمصاريف

هو هيتكفل بالمصاريف انا على مصاريف اكلى وشربى بس

 تعرفى انا دعيت فى رمضان ان ربنا يرزقنى حج مبرور

شحيبر هو الحج مشوار وبس الحج ده حاجات كتير

ماانا عارف عشان كده اشتريت شريطين اسمعهم وهاحضر محاضرات فالجامع عن الحج سيبينى بقى

ذهب شحيبر واستخرج الباسبور وشرع فى الاجراءات

شحيبر

يانعم

انت مفهمتنيش لما قلت لك ان الحج ده مش مجرد مشوار

ليه قصدك ايه

الحج ده يعنى برستيج ومستوى تانى احنا مش قده

يعنى ايه

يعنى لما تاخد لقب حاج لازم تكون قبلها جهزت بناتك احسن جهاز

 ووضبت شقتك وغيرت العفش مرتين على الاقل واشتريت شقق لولادك يتجوزو فيها

 ويكون عندك عربية على الزيرو و----------------

حيلك حيلك ياشحبورة كل ده قبل الحج

ايوة امال ايه انت فاكر ان معاملة الناس ونظرتهم ليك وانت الحاج شحيبر زى الاول

لا طبعا يعنى البواب اللى كان بيقبل منك اكرامية 5 جنيه هيعوز 10 –

اخوك اللى مسافر برة وبيبعتلنا كسوة العيال كل سنة خلاص مس هيسأل فيك

– هدومى اللى ماغيرتهاش من 5 سنين لازم اغيرها

مين اللى قال كل ده

العرف والناس والمجتمع

مجتمع ملخبط واولوياته ملخبطة انتى عارفة ان فىه مسلمين مبيعرفوش عربى

 وعايشين فى بلاد بعيدة جدا الواحد فيهم من يوم مايتولد يعمل صندوق للحج يحوش فيه لغاية مايحج

 وده هدفه الاول تقومى تقوليلى برستيج وغير العفش

الناس هتتكلم علينا وهتشوف

انتى عارفة والد الاستاذ جمال كان بيبكى زى الاطفال لما زوجته مرضت وكان هيتلغى حجه

قال ياابنى انا ضاع عمرى من غير ما افكر فالحج كنت مخليه فى اخر اولوياتى دلوقتى هاحج على كرسى متحرك

 وياعالم اعيش واللا لا عاوزانى ارفض الفرصة دى عشان احج وانا زيه

طب معاك فلوس للزفة وانت رايح وانت جاى

زفة ايه ياشحبورة

زفة ايه يعنى مش هتلبس ابيض فابيض ويزفوك فرقة حسب الله وياحاج بيت الله

لا طبعا بلاش كلام فارغ

طيب ولما ترجع مافيش دبيحة تحت اقدامك ونخمس بدمها على الحيطة ونكتب حج مبرور ياحاج شحيبر

لا طبعا ايه البدع دى سيبينى اقرا فى الكتاب ده خلينى اعرف مناسك الحج

شحيبرررررررررررررررر

الصبر من عندك يارب يانعم

طيب مش هتغير اليافطة اللى على الباب وتكتب الحاج الاستاذ شحيبر

لا لا لا
ممكن تسيبينى بقى

انا مش هاقول لحد انك رايح تحج انا هاقول انك فى مأمورية

انتى حرة سيبينى بقى

شحيبر بيجهز الشنطة عشان السفر شحبورة ماسكة ورقة عمالة تفردها وتطبقها فى تردد

شحيييييييييييبر (بتدلعه )

عيون شحيبر

تسلم لى ياجوزى ياحبيبى طبعا انت مش هتكسفنى مع الناس

ناس مين

ماهو الحاج لما يرجع لازم يجيب هدايا ودى ورقة بالهدايا عشام متغلبش حالك

بس ياشحبورة انتى عارفة الظروف

تبكى ماهو مش معقول تحرمنى من زفتك وانت رايح وانت راجع وكمان تيجى من غير هدايا

 اودى وشى من الناس فين

نظر فى الورقة
دستتين ساعات – 6 دست شرابات حريمى و6 رجالى – 10 دست سبح – 10 دست طواقى – 2

 عباية صوف واحدة لك وواحدة لوالدى - 6 دست أشاربات - 4 كوتشيهات للعيال

– عباية بيضاء مطرزة ملعلطة مقاسى

إيه ده كله ياشحبورة مين اللى هيجيب كل ده

دى حاجات بسيطة وهناك الحاجة مش غالية

واحنا رايحين للعبادة واللا للف فالاسواق

ماتخافش ياخويا كل حاجة هتلاقيها قدامك على الارصفة

مش هاقدر اجيب هدايا ياشحبورة لو معايا ماكنتش قصرت

تنتحب ياعينى عليكى ياشحبورة حتى فرحة حجه مستخسرها فيكى

يحتضنها مودعا شحبورة كنت فاكر انك هتطلبى منى دعوة حلوة واللا هتشبطى تيجى معايا

 مش اولوياتك كلها دنيا وبس
تنظر فى الارض ندما – طيب ممكن ازغرط وانت نازل

ياشحبورة ياشحبورة يوم ماتحبى تعملى حاجة كويسة تزغرطى بلاش احسن ياشحبورة

سافر شحيبر وحج وعاد بعد 15 يوم
دخل على شحبورة بدل الشنطة بشنطتين
زغردت شحبورة فرحا بعودته ثانيا وبالشنطة الزيادة اولا
وبينما هو ياخذ حمامه
تفتح الشنط فى لهفة ولكن يغمى عليها وتصرخ
هدووووووووووووووووم منتنة متفسخة وشرابات متسخة

هذا كل ماجاء به شحيبر
ولكنه فاز بحج مبرور وذنب مغفور
وفازت شحبورة بوجبة غسيل دسمة تشتغل فيها اسبوع وفازت ايضا بلقب مدام الحاج شحيبر