مغامرات حنكش وكرشة

حوار فى الإمتحان

حوار النتيجة

دكتووووووور نفسجى ياناس

هو إيه الحوار

بنعبى الوهم فى قزايز

حنكش وكرشة(والله لنسقطلكم)

حوار فى الإمتحان

أ بطالنا ... حنكش ... ( عبد الحكيم ) وكرشة ... ( كريم ) طلبه جامعيين فاشلين

 كغيرهم من بعض شباب هذة الايام .... من اسر طيبة متدينه – ينتمى ابطالنا لشله فاسدة

همها الاول والاخير هو قضاء اوقات يعتقدون انها سعيدة بعيدا عن مزاولة الاهل والدراسه ...

 نحن الان فى اخر العام والامتحانات على الابواب .... دار الحوار التالى ...

- واد يا كرشة ايه الحوار ؟

- كرشة ( مسطول ) حوار ايه ماهو زى العسل اهو ؟

- فوق كدا وقولى هنعمل ايه فى حوار الامتحان؟

- ولا حاجة هنسقط

- يخربيتك ... ما انا عارف بس ايه الاسباب .... التيرم اللى فات تهمتها فى ان

 اللى بياخدوا كورسات بس هما اللى بينجحوا

 وابويا وامى عملوا جمعية عشان الكورسات . وكنت باخد الفلوس ونروق بيها كلنا

- وبعدين فى الذل دة ؟ السنه اللى جاية انا الحوار دة .... احنا عندنا كام مادة ؟

- ست مواد ... شوف انا حضرت حوار لاربع مواد وعليك انت المادتين الباقيين .

- قول اشجينى

- اول يوم هقولوهم ان انا متوتر وتعبان وان المادة دى مش جاهز لها

 والجدول ( شتيمة) عاملين فيه المادة دى قبل اللى بعدها بيوم

 عشان انا شايلها من السنه اللى فاتت فانا مش هدخلها وامتحنها فى الدور التانى

 عشان اركز فى اللى بعدها

- حلو .. حلو اوى واللى بعدها ( يشد نفس من الشيشة )

- المادة اللى بعدها هركز فيها حلو اوى واقعد نموذجى جدا فى البيت

واروح الامتحان الصبح واقولهم يدعولى ..

. وبعدين ارجع اقولهم الامتحان كان( ابن .... ) ومعرفتش احل لا انا ولا زمايلى .

- تمام حلو اوى ... الحوار التالت بقى ؟

- هطبق اذاكر ( معاكم طبعا ) وارجع وش الصبح وانزل نموذجى وبردو يدعولى

 وارجع اقولهم دخت ونمت فى الامتحان عشان طبقت واعصابى تعبت

- الله عليك يا حنكش يا عسل ... دة انت مزاج خد لك نفس ... فين الحوار الرابع ....؟

- الحوار الرابع دة بقى نمرة بس عليك انت بقى يا مجدع تدبرلى حاجة كدا على ذوقك

 اخدها على الصبح ودور اسهال وطراش واعمل بيها المظلوم الغلبان .

- ولا يهمك اجيبلك دبوس حشيش مغشوش من عند الواد سيكا النتن واديها ....

تطرش وتسهل لتانى يوم

- يخرب بيتك يالا .... اوعى اروح فيها

- متخافش اخوك ايده ميزان وبعدين ما احنا هنعملوها سوا

- هاتلى بقى حوارين للمادتين الجايين

- حوارين ... حواريين ... ما تيجو نذاكرهم وندخل وننجح فيهم ؟

 .... لا متنفعش نبقى خالفنا قوانيين الشلة

 بص بقولك ايه نطبق برشامتين من الواد صلصة الدحيح

( صلاح الدين اسماه اهله هكذا تيمنا بصلاح الدين وسمى الدحيح لانه متخصص برشمة المناهج )

 وعندك حوار احتياطى : اللجنه كانت زيطة والكل بيغش ... وانا الوحيد اللى مغشتش عشان حرام ...

 شطبوا على ورقتى ....

حوار تانى احتياطى بردو : ذاكرت وجاوبت والامتحان كان سهل واتظلمت فى التصحيح ...

عاوز اعيد تصحيح ورقتى مظلوم يا ناس .

- ولما يصححوها يا حلو ....

- يصححوا مين يا ابويا ... اعادة تصحيح المادة 500 جنيه مين اللى هيدفعهم

 هعمل فيها امينه رزق واقولهم هضحى بمستقبلى عشان اوفرلكم

- الله عليك يا مزاج انت يا عسل . يللا بقى نكمل السهرة والواحد ضميرة مستريح

اخوك طابق 100 جنية مراجعة ليلة الامتحان احنا اولى بيهم .



                                يا ترى حنكش وامثالهم بيحوروا على اهلهم ولا على نفسهم

وبيظلموا اهلهم ولا نفسهم وايه اخرتها هيفوقوا امتى؟

 لما يضيع مستقبلهم ؟ وهيقابلوا ربنا ازاى ؟ اسئلة كتير محتاجة اجابة ...

 يا ترى حد هيعرف يجاوب عليها ولا دى كمان محتاجة برشامة ....

 

حوار النتيجة

النتيجة على الأبواب و بالرغم مما حدث في حوار الامتحان إلا أن النتيجة لها حوار آخر
حكنش : واد يا كرشة النتيجة قربت إيه الحوار
كرشة : حوار تاااني ما إحنا حورنا خلاص في الامتحان المفروض يكونوا فهموها بقى و السقوط مش هيبقى نمرة يعني
حكنش : مش عارف بس برضو عندهم أمل إني أعدي و لو في مادة واحدة بس
كرشة : ما قلنا خلاص مظلومين في التصحيح
حكنش : عاوزين حوار متين فكر معايا
كرشة شوف أنا الكام يوم الجايين هرسم لهم فيها دور الشاب المتوتر و ادعيلي ياما و ادعيلي يابا و ادعيلي يا تيتة
حكنش : إلا تيتة دي..دي الوحيدة اللي هارشة حواري و رايحة جاية تديني كلام في عضمي
كرشة : مش هي دي بتاعة الصحاف و الأرانب أعوذ بالله . ابعد عنها خالص.
حكنش : كل ماقول لها ادعيلي و اللا أمي تقول لها ادعيله تقول ( قالوا أبو قردان راح الغيط قال كان بان على عراقيبه )

عشم إبليس في الجنة.
الدعوة الوحيدة اللي بتدعيها ( ربنا يصلح حالك )
كرشة : خلاص بلاش تيتة المهم تحسسهم بالتوتر و إنك خايف من النتيجة..

 قوم إيه لما تطلع يبقى همهم يخففوا عنك بدل ما يزاولوك .
حكنش : و بعد ما تطلع راسب كله يا حلو
كرشة : و لا حاجة هأقفل على نفسي في أوضتي و أضرب عن الطعام و أعيش دور الشاب المكتئب المحبط

و هم اللي هيتحايلوا عليا إني أفكها و مش بعيد يعملوا زي الواد توتو اللي أبوه غيرله العربية لما سقط عشان يخفف عنه
حكنش : غير له العربية بس هم يغيروا لي الشراب ، انت عارف الواد سيكا عمل إيه لما سقط السنة اللي فاتت
كرشة : عمل إيه
حكنش : أبوه اتخانق معاه و كرشه من البيت ( طرده ) و ده ما صدق و راح قضى يومين عند الواد عبده فياجرا في الساحل الشمالي

 و أهله قلبوا عليه الدنيا و اتحايلوا عليه يرجع و رجع زي الملك
كرشة : أنا عارف إيه لازمة الحوارات دي المفروض أهالينا يكونوا كووول و يتقبلوا الأمر ببساطة و روح رياضية
حكنش : شوف إيه رأيك ليلة النتيجة تقعد تصلي و تشغل القطارة ( تتباكي ) و تعيش دور الشاب السني بتاع ربنا

 يمكن تحصل معجزة
كرشة : و ماله نعيش الدور بالك انت أنا صليت الجمعة الأسبوع اللي فات
حكنش : إيه البوظان ده يا متطرف إنت يا عسل و اشمعنى يعني.
كرشة : أبدا كنت ماشي ورا مزة و دخلت بيت تحته جامع قعدت مع الناس اللي فارشين في الشارع قلت يمكن تنزل بعد شوية

 بس إيه عدى شوية مزز إنما إيه مكنه يابا مكنة و الوضع و انت قاعد حاجة تانية خالص
حكنش : أما انك واد نتن صحيح حتى في الجامع ، صحيح أنا صليت آخر مرة من 5 سنين بس على الأقل بصلي و أنا متوضي

 مش زيك .
كرشة : بأقولك إيه اللهم اخزيك يا شيطان خلينا في حوار النتيجة هات تموين الثلاث أيام اللي هأعيش فيهم الدور

 على الأقل أعمر دماغي برضو. و نتقابل يوم الجمعة
أما عن والدي حكنش و كرشة فبالرغم من توقعهما للنتيجة إلا أنهما عاشا بالأمل لعل الله يحدث أمرا

 و كان وقع النتيجة عليهمت كمن أصابته ضربة على رأسه فهذه أم حكنش تكاد لا تقف على قدميها و والده و قد أصابته ذبحة ،

 و كرشة والده كاد ارتفاع السكر أن يقتله و والدته في ذهول
و يبقى السؤال كيف يكون التصرف مع أمثال حكنش و كرشة ليس بالضرورة أن يكونا مدمنين أو حشاشين

 و لكن ما أكثر الشباب الذي فقد هدفه في الحياة و لا يعرف مصلحته و يستخدم ذكاءه فقط في خداع الأهل و التحايل على الحياة .

دكتوووووووووور نفسجى ياناس

العام الدراسى على الأبواب وأصدقاؤنا حنكش وكرشة مازالا يبحثان عن الحوار

وحوارنا هذه المرة حوار الأجيال

والدا حنكش قررا أن يحاولا التفاهم معه ومحاولة معالجة أسباب الفشل

-كلميه انتى عشان أنا ضغطى عالى ومش عاوز إنفعال

--ياريت تكلمه إنت انتو رجالة وتفهمو بعض أكتر

--أمرى لله ناديهولى

-- حكيم ياحكيم تعالى بابا عاوز يقعد معاك شوية

--يقعد معايا ده إيه إبتدينا المزاولة بقى

--عيب ياولد فيها إيه لما بابا يقعد معاك

--طيب من الآخر كده بلاش تقطيم ولا كلام فى حوار الدراسة عشان أنا اتخنقت من الحوار ده

عبد الحكييييييييييم

--نعم يابابا

--تعالى هنا جنبى تعالى فى حضنى عاوز أتكلم معاك كأصدقاء

--هو ايه اللى جرى فى الدنيا ياناس هو يوم باين من أوله ربنا يستر (يحدث نفسه)

--انت طبعا إبنى الكبير وراجل البيت من بعدى ويهمنى مصلحتك

--أكيد يابابا

--شوف ياعبده تحب أقولك عبده واللا حنكش

--انت عرفت حنكش كمان لا قول حكيم بلاش ناخد على بعض

--يبتلعها الأب مبديا أنه كووووووول

طيب شوف ياحكيم طبعا عاوزين ننسى اللى فات ونبتدى صفحة جديدة وعشان كده لازم نحط ايدنا على الأخطاء عشان نصلحها

 فى رأيك إيه أسباب فشلك سنتين متواليتين دراسيا

--ماقلنا السيرة دى بلاش نشوف موضوع تانى أحسن بدل ما نخسر بعض

--موضوع زى إيه مثلا

--إنتخابات الرئاسة البامية الكوسة أى حاجة

--ماهو لو اتكلمنا فى انتخابات الرئاسة هتلاقى ان حسنى نجح وانت لأ

--برضو- شوف بقى يابابا أنا محبط

--ايه اللى أحبطك

--كان نفسى أدخل صيدلة وماجبتش مجموع فدخلت الآداب وأنا كارهها

--بقالنا سنتين فى القصة دى ماعندكش غيرها

يعنى انت جبت مجموع صيدلة وحدغصب عليك تدخل آداب واللا كنت عاوزنى أسرق وأدخلك جامعة مفتوحة

--شوف أديك بدأت تتنرفز بلاش نكمل الحوار عشان صحتك بقى

--يبتلع الأب حباية ضغط –لأ يا حكيم عاوزين نوصل لحل ماهو مش معقول مالكش أى مستقبل

--الكلية فيها 13 مادة ده يرضى ربنا وكمان كله ماشى بالكورسات والكوسة والإمتحانات بتتسرب

واللا عاوزنى كنت أغش واللا أبرشم زى غيرى

--يصرخ الأب

إنت بتستعبط آداب صعبة وصيدلة اللى كانت هتبقى سهلة أنت فاكرنى بياع فجل واللا عربجى

 أنا متخرج من نفس الكلية ونفس القسم اللى انت فيه ياإبنى ده اللى كان بيعدى جنب سور الكلية بينجح

 إنت اللى صايع ولعبى لابتروح كلية ولا عندك أى إحساس بالمسئولية
--إبتدينا الغلط بقى إنت قلت من الأول هنبقى إصحاب وحوار الأجيال وجاى دلوقتى هتطير التعميرة من دماغى

خلاص بقى كفاية كده

--أقعد هنا وإسمع للآخر

السنة دى آخر فرصة لك فى الإعادة لو سقطت هتترفد وأنا بأقولك أهوه مافيش كورسات ولا مراجعات ليلة الإمتحان

 وسواء نجحت واللا سقطت شهادتك دى هتبلها وتشرب ميتها هتنزل تشتغل من بكرة

--أشتغل إيه

--تشتغل أى حاجة تشيل طوب تسلك بلاعات المهم تشتغل وخلاص إنت مش هتعرف قيمة الشهادة

غير لما تحاول تشتغل من غيرها ده إذا نفعتك الشهادة

--طيب هأشتغل بس هأذاكر برضو وهأنجح وهتشوف—مش هتبقى تدينى حتى مراجعة ليلة الإمتحان

--يصرخ إنت فاكرنى نايم على ودانىىىىىىىى لا بتحضر مراجعة ولازفت وبتتنيل بنيلة بالفلوس

 مامتكم كتبت كل حاجة وحواراتك مالية المنتديات غور من قدامى قبل ما أقطعك .
--منك لله يامامتكم .

أما كرشة فقد إتخذ الحوار شكلا آخر

--شوف ياكريم أنا مش هأضحك عليك أنا كنت شاب زيك ومريت بنفس المرحلة لعبت وسرحت وسقطت بس فوقت بسرعة

 وصلحت مسارى إنت بقى مستنى لما تتفصل عشان تفوق

--كريم مزود العيار شوية وأفوق ليه ما أنا مبسوط كده أنا كده قشطة وميت فل وأربعتاشر

--مبسوط وانت هتترفد

--وهى الشهادة هتعمللى إيه ما العالم مش لاقية شغل أهى كده على القهوة وكده على القهوة أتعب نفسى ليييييييه

لأ الولد ده محتاج دكتور نفساوى

فى عيادة الدكتور

--هيه ياكريم ايه مشكلتك

--أنا ماعنديش أى مشاكل

--أومال مين اللى عنده مشكلة

--هم اللى محتاجين علاج لازم يبقو كووووول مش عارف بيتنرفزو ليه

--طيب بلاش الكلام عنهم

إنت نفسك في إيه

--ولا حاجة

--بتحلم بإيه

--ولا حاجة

يبدأ الدكتور فى ترديد الغنوة نفسك فى إيه كماننا

--لأ ولا حتى كماننا

مانفسكش تبقى غنى أو مشهور أو ناجح فى حياتك

-لأ

ولا حتى يبقى عندك فلوس كتير

-يمكن دى آه

--طيب إيه تصورك لطرق الحصول على الفلوس

-ممكن بابا يديهالى أو مثلا أتجوز واحدة غنية تصرف عليا

--أنت شايف إن دى وسيلة محترمة للحصول على الفلوس

-لعلمك بقى دى وسائل شريفة أنا إتعرض عليا أشتغل كومبارس فى أفلام ممنوعة

 وإتعرض عليا أتاجر فى ممنوعات وحاجات كتير قوى أكسب منها فلوس بس أنا عندى مبادىء

--طيب فيه وسائل تانية أنك تنتهى من دراستك وتتعلم جنبها لغات وكمبيوتر وتطور نفسك وتبقى إنسان نافع لنفسه ولمجتمعه

---يييييييييييييييييييه كوووووووول ده لا لا شوف موضوع تانى نتكلم فيه أحسن

--طيب انت بتحب إيه

--ولا حاجة

--بتفكر فى إيه دلوقتى

--ولا حاجة

--طيب إيه اللى بيضايقك

-- المزاولة مزاولة بابا كل شوية قول لهم فى الروشتة ممنوع المزاولة

--انت عاوز تبقى إيه

--مش عارف

--رؤيتك للمستقبل

--مش شايفه

بدأ الدكتور يتوتر وتظهر عليه علامات الإنفصال

خرج من عنده كرشة وهو يقول مش عارف الراجل جرى له إيه
 

                                         شوفووووووووله دكتوووووور نفسجى ياناااااااااااس

هو إيه الحوااااااار

تفق والدا حنكش وكرشة أنه لابد من العمل هذا هو ما سيجعل الفتيان يعرفان قيمة الحياة
ويصقل شخصيتهم ويدفعهم للنجاح
حنكش :إيه رأيك فى حوار الشغل ده
كرشة:هيكون إيه يعنى أهو نوع من أنواع المزاولة خلينا معاهم للآخر
-طيب وهنشتغل إيه
-هيكون إيه يعنى أكيد شغلانة محترمة مثلا يعنى مدير علاقات عامة
-لا لا لازم الواحد يكون واقعى ممكن مثلا مندوب مبيعات
-بص هو أبويا قال لى الحاجة الوحيدة اللى هأساعدك بيها إنى أديك كارت لواحد زميلى فى شركة تشغيل
-حلو الكلام يعنى معانا واسطة بينا عليه
-طيب نروح الأول نطقم كده ونلبس الوش النموذجى إنت عارف العالم دى يهمها المظاهر
أوكش ياعسل
-إلتقى بطلانا عند باب الشركة
حارس الأمن رايح فين يا كابتن إنت وهو
-بتكلمنى أنا
-أيوة
-أولا أنا مش كابتن ثانيا إحنا جايين بكارت نقابل ممدوح بك
-بخصوص
-بخصوص شغل
-شايفين الأمة اللى هناك دول
-آه
-إركن على جنب معاهم لغاية ما ننده عليك وخد إملى الورقة دى وحطها عند السكرتيرة
حنكش هو إيه النظام دى حاجة ما تطمنش
كرشة هو أبويا ده أنا بأخاف من توصيته شكله كده موصيه يبهدلنا
حنكش بص أى بهدلة أنا هأنسحب
كرشة خليك جدع أومال نملى البيانات ونظبط السكرتيرة
ملأ بطلانا البيانات وذهبا للسكرتيرة بعد أن شقا طريقهما بصعوبة إليها
يااااااااااااااااااااااماما هى دى السكرتيرة
إثبت أومال خليك راجل للآخر
جلس حنكش وكرشة وسط كم هائل من الشباب
كابتن هى إيه الوظائف هنا
حراس أمن
إيه بس كده كل العالم دى حراس أمن فى بنك يعنى
بنك إيه فى مول فى عمارات
حلوة حكاية المول دى الواحد يظبط فيها بنات للصبح
فاضل 4 شباب منهم بطلانا
السكرتيرة تنادى شابين وتبقى حنكش وكرشة
سعادتك هو لسه فاضل وظائف
(بقرف) فاضل وظيفتين وأنتم 4 اللى دخلو دلوقتى وانتم بعد المقابلة هنقرر
بس كان معانا كارت لممدوح بيه
ماهو عشان كده هيقابلكم والا كنا استكفينا بالعدد اللى عندنا
ممدوح بك
أهلا ياكريم إزيك يا حكيم تعرف أنا بقالى 12 سنة ما شفتش بابا بس الذكريات الحلوة ما تتنسيش
هيه يا أولاد أنت بقى إتخرجتو منين
لأ هو حضرتك إحنا لسة ما إتخرجناش
هو بس يعنى حصلت ظروف فمحتاجين نشتغل
ياخبر ظروف إيه طمنى الوالد بخير
هو بخير بس إحنا السنة دى بنعيد السنة للمرة التانية وما عندناش حضور فقلنا نشتغل يعنى
لا هو حضرتك مش إحنا اللى قلنا هم اللى قررو يبهدلونا فى الشغل
وهو الشغل بهدلة يا إبنى
لا مش قصدى بس يعنى
المهم
نظر فى أوراق بياناتهم ثم قال لهم
شوفو يا أولاد هاكلمكم بصراحة كان فاضل وظيفتين حراس أمن فترة ليلية الشابين اللى دخلو قبلكم

واحد فيهم فى بكالوريوس هندسة بينجح بتفوق كل سنة ومحتاج الشغل عشان يوفر تمن المشروع بتاع التخرج

 والتانى فى كلية تجارة إنجليزى مصاريفها عالية ووالده متوفى المعاش يادوب يكفى والدته وإخواته لو إنت مكانى أشغل مين 
شوفو ياشباب أنا محتاج ناس جادة ومنضبطة ومحتاجة للشغل عشان تؤديه على أكمل وجه

هو إحنا قلنا هنشتغل رئيس وزراء ده حارس أمن يادوب ب200 ملطوش ما يكفوش مواصلات واللا سجاير
أنا بأهنىء بابا على حسن تربيته لك سلملى عليه ولو فيه وظيفة هأبعتلك مع السلامة
بعد أن خرجا ينظران لبعضهما

يقلده صلملى على بابا مع الصلامة إيه الأنزحة دى
أنا عارف ياعم أهى دى آخر توصية أبوك
وبعدين هنعمل إيه
ولا قبلين نقعد عالقهوة زى الملايين اللى قاعدين دول
أيوة جاااااااااااااااااى قهوة شاى كازوزة شيشة
هات أرخص حاجة عندك
ليه بس يابو الشباب ده إنتو شكلكو بهوات
بهوات إيه ونيلة إيه عندك هنا حد عنده شغل
طبعا بس من بدرى كل يوم فيه مقاول أنفار بييجى يحمل من عندى أنفار للمعمار بس إيه من بعد الفجر
ودول يوميتهم كام
تعملها كده من 10 ل15 جنيه حسب التخصص
تخصص إيه
ما هو سعادتك لا مؤاخذه فيه ناس تشيل بس وناس تخلط وناس تصب وكل حاجة من دى لها فن وخبره
أيوووووووووووه كل حاجة عاوزة فن وخبره
الشاى سعادتك
نظر حنكش لكرشة وتساءلا منفهشين هو إيه الحوار
فكك من شغل المعمار ده ندور على شغل مكاتب
تعالى نروح لخالى عنده شركة كمبيوتر
ياخالو عاوزين شغل
ياسلام بس كده
بتعرفو إيه
نعرف إيه فى إيه
كمبيوتر مثلا
آخرنا ريستارت
والنت
ممتازين فى الشات
ولغة
عربى مكسر وانجليزى وفرنساوى طشاش
طيب عاوزين تشتغلو إيه
أى حاجة فى مكان مكيف ومن غير بهدلة
مش عارف أقولكم إيه يا أولاد بس فعلا لازم تاخدو دورة كمبيوتر ودورة إنجليزى على الأقل

عشان تفتح كلام فى موضوع الشغل فى أى مكان
بتبيعنا يعنى ياخالو يعنى أروح أشتغل فى المعمار مثلا أشيل طوب واللا إيه
لا والله ماهى كده بس هى الحياة كده لازم تكون معاك صنعة أو متميز فى شىء

 عشان تعرف تلاقى مكان وسط الملايين اللى حواليك
بصو يا أولاد تعالو من بكرة هأديكم دورة كمبيوتر مجانية وانتو وشطارتكم
عاجبك كده واحد يهزءنا والتانى يتصدق علينا هى دى أخرتها
مش عارف والله إيه اللى بيحصللنا وعندى سؤال واحد مش عارف له إجابة