يوميات عائلة شحيبر

ضيف على الافطار

النهاردة حصل معايا حتة فصل يفرس ...هاحكيهولكم

قبل المغرب بربع ساعة وانا ملخومة فى المطبخ( النهاردة يعنى أكل قرديحى بواقى أكل الايام اللى فاتت)

 بس لازم أقدمها بطريقة كويسة إحنا فى صيام وكمان مع شوية سلطات يبقى كله تمام

حصل الآتى 

شحيبر يفتح الباب ياساااااااااااتر طريق ياشحابير

 خير اللهم إجعله خير ضيف دلوقتى

   ياشحبورة معايا ضيف هيفطر معانا النهاردة

  ضيف وبتقولها كده ببساطة اقف هنا كلمنى رايح فين

  فيه ايه بس اسيب الراجل لوحده

هيفطر ايه ده بقى ان شاء الله مش كنت تدينى خبر من بدرى

  وانا اعرف منين بس انا كنت فى الجامع بعد صلاة العصر زى كل يوم

 قابلته زميل دراسة قديم عربيته عطلت مش هيلحق يروح كان ناوى يفضل فالجامع لكنى مسكت فيه على الافطار مايصحش

وتمسك فيه ليه احنا ناقصين النهاردة بالذات الاكل على القد والعيال صايمين تحرجنا ليه مع الناس

    ياشحبورة ربنا هيبارك حطى كل اللى عندك ولا يهمك ربنا هيبارك وناخد ثواب افطار صايم

 ماليش دعوة مش هيفطر هنا واللى عندى قلته

  ياشحبورة انا هآخده واصلى معاه المغرب في الجامع وانتى حطى الأكل اللهم إنى صايم

 أهو إنت كده تمشى اللى فى دماغك وعمرك ماعملت حسابى ولا حساب شكلنا قدام الناس

ونزل شحيبر وضيفه للصلاة  ....واحتست حوسة

كلمت جارتى

  بسرعة ياهناء حصل كذا وكذا ومحتاسة اسعفينى

   ولا يهمك انا هأخللى وحيد جوزى يمسك فيهم الاتنين على الفطار الاكل عندى النهاردة يكفى ولايهمك

خلصت الصلاة      وماحدش رجع لا وحيد ولا شحيبر ولا ضيفه

 ياهناء شحيبر عندك

لأ.... تعرفى ايه اللى حصل ؟ وحيد كلمنى وقاللى ان جارنا الاستاذ جمال عامل عقيقة فى المسجد ..

 وكان بيدور على شحيبر ووحيد عشان يعزمهم ... وفطرو معاه افطار مافيش كده .. بس إيه انا أخدت ثواب النية

 والله كنت ناوية أفطرهم وأنا فى منتهى السعادة ده رزق ربنا بعتهولى .. ضيف على الافطار؟ ياريت كل يوم

وااااااااااء وانا خسرت ثواب النية وزعلت شحيبر .

 توبة توبة والله توبة يارب يجيب لى كل يوم ضيف على الافطار.