كلما هبت على نسائم باردة فى لفح الحر الشديد الذى اعيش فيه

 بدلا من ان اسعد بها اتذكر تلك الجريمة التى ارتكبتها فى تلك الليلة شديدة البرودة

 من ليالى فبراير
خرجت انا وابنائى متدثرين ببلاطى وسويترات تقينا برد فبراير

 لازور اخى فى منطقة هادئة شديدة الهدوء قريبة من البحر

 ولذلك فهى شديدة البرودة
نزلت من سيارة الاجرة وانعطفت فى الشارع المظلم

بجوار فيللا مدير الامن بالاسكندرية
عادة ما تهيج فى هذه المنطقة ذكريات الطفولة فاتلكا فيها

ولكن من شدة البرد اسرعت الخطى وانا اتكتك من البرد
سمعت وقع اقدام خلفى
اسرعت الخطا اكثر فانا فى حتة مقطوعة كما يقولون
نادى على لوسمحتى
صوت شاب فى بدايات الشباب
التفتت --فتى فى الرابعة او الخامسة عشر
مهندم مظهره كما يطلق عليه البعض ابن ناس
مد الى يده بلفافات من المناديل الورقية
عاوزة مناديل
قلت له شكرا وهممت بمواصلة طريقى
اعترضنى فى لهجة محتجة
وصرخ صرخة مكتومة
هو محدش راضى يشترى منى ليه
الله يخليكى ياطنط اشترى منى قالها باستعطاف مزقنى
بحثت فى جيوبى لم اجد فكة كل ما معى 20 جنيه مجمدة
قلت له معنديش فكة معاك باقى 20
قال فى اسى وهو انا لو معايا 20 كنت هافضل فى البرد ده
الله يخليكى ياطنط اشترى منى عاوز اروح انا سقعان
بحثت نهى فى جيوبها ولملمنا فكة تكفى لشراء باكيت واحد من المناديل
وانا اتناول منه المناديل واعطيه الفلوس
لمست يدى يده
ااااااااااااااه
قطعة من الثلج والله يا ابنائى رصاص

حانت منى التفاتة لملابسه وجدته يلبس قميص خفيف

 واضح انه يرتديه على اللحم فى عز هذا البرد
ياقلب امك يابنى مش عارفة اقدر اعمل لك ايه
قال لى ولا حاجة شكرا ياطنط
انصرف وعيناه دامعتان
وانصرفت وانا اتالم لحاله
لم ارتكب الجريمة بعد
بحثت فى المنطقة الراقية فلم اجد دكانا اشترى منه اى حلوى لابناء اخى
حيث اننى عمتو ولازم ادخل بحاجة حلوة
فلم اجد الا دكانا سياحيا لا يبيع الا كل ماهو مستورد
انتقيت 6 قطع من الشوكولاته لاولادى واولاد اخى
كم الحساب 18 جنيه
دفعتهم بمنتهى البساطة وخرجت وفجاة
شعرت بجريمتى 18 جنيه ادفعهم ببساطة للذة مؤقتة

 ويا عالم هيستفيد منهم شارون قد ايه
ولم يخطر ببالى ان ادفعهم للولد البردان واشترى منه كل ما معه من مناديل

 واتركه يروح
دخلت على اخى منهارة باكية
سالنى فى انزعاج ماااااااااالك
رويت له ماجرى قال لا حول ولا قوة الا بالله اين الولد وصفت له المكان
اخذ جاكيت من عنده ونزل به يجرى ليدفىء به الفتى
بحث وبحث فلم يجده
ومن وقتها يا ابنائى كلما تذكرت هذه الجريمة اقشعر بدنى وسالت الله ان يغفر لى
احيانا نكون من الحماقة بحيث لا ندرك كيف نتصرف بحكمة
ونعود ونندم حيث لا ينفع الندم